Aizawl: Inrinni chawhma khan Mizo Students’ Union (MSU) hruaitute chuan, Higher & Technical Education Minister Dr. Vanlalthlana chu a chenna inah an kawm.
MSU hruaitute chuan minister hnenah hian kum 2019-a RUSA hnuaia Asst. Professor, MPSC kaltlanga direct recruitment zirtirtu 70 lakte chungchang an thlen a. College zirtirtu lakte hi kum hnih hnua Mizoram sorkarin a chhawr chhunzawm tura lak an ni a. Sorkar hnuaia an ngheh thuai theihna turin MSU chuan minister hi hmalakpui turin an ngen.
Dr. Vanlalthlana chuan MSU hmalakna chu awm a tihpui a. RUSA hnuai atanga Asst. Professor lak te hi, an ngheh ngei theihna turin sorkar lam pawhin hma an lak mek thu a lo hrilh a ni.
MSU chuan RUSA hnuaia Asst. Professor thawk mekte regularise an nih theihna tura hma an laknaah lawmthu an sawi a. Heng zirtirtute chungchanga hmalakna hi MSU chuan a ngaihven zui zel dawn niin an sawi.