Sorkar laipui chuan January atanga Jharkhand leh Punjab-a a len hnuah state pakuaah H5N1 virus (bird flu) a len thu puangin inralring turin a ti.
Zirtawpnia thuchhuah a siamah Dairy & Animal Husbandry Department chuan state leh union territory (UT) thuneitute chu hri a darh theihna lai – ar farm leh sava leh ar zawrhna hmunte thlithlai ngun turin a ti.
A tul angin state tinte chu National Action Plan for Avian Influenza siam chu kengkawh turin a ti bawk.
“Hri a len theihna hmun lai – sava nung zawrhna, sava pem chi awm khawmna, ar/sava lam tamna lai bik thlitlai uluk tur a ni a. State-te hi National Action Plan for Avian Influenza (Revised 2021) angin thil kalpui tur a ni a, rapid response team tihnun tur a ni a, veterinary leh laboratory thil thuam chak tur a ni,” tiin kaihhruaina tihchhuahah tar lan a ni.
India-ah hian hmun hrang hrangah bird flu a leng nia sawi a awm a, kar liam taah khan a darh zel tur ven nan Ranchi-ah sava 5,500 suat a ni tawh a. Jharkhand-ah hian Ranchi district-ah a leng tih puan a ni tawh a, sava 250 vel a thi tawh niin ICAR-National Institute of High Security Animal Diseases (NIHSAD), Bhopal chuan a finfiah a. Hri hi sorkar ar farm atanga darh nia hriat a ni.
Sorkar laipui chuan hri hi sorkar farm atanga darh a ni tih finfiah a ni tawh tih a sawi a. Fimkhur tawk loh vang niin a sawi bawk.
Telangana-ah pawh bird flu hi a leng a, hmun hrang hrangah ar note 3,500 an thi tawh a. Thla hmasa khan state sorkar chuan an thenawm, Andhra Pradesh atanga ar lak luh a khap tawh a, hri hi East Godavari district atanga darh niin an hria a ni.