India chess grandmaster ropui, Viswanathan Anand-a chuan khawvel pum huap chess pawl, FIDE president dinhmun a luah lailawk a. Hei hi president ni lai, Arkady Dvorkovich-a kum 2022-a intan Russia leh Ukraine indona vanga European Union (EU)-in a hrek zinga a tel ve vanga a a inhnuhdawh vanga a ni.
EU hrekna vawi 21-naa mi 48 telte zingah Dvorkovich hi a tel a. Hemi hma hian kum 2012 atanga 2018 chhung khan Russia-ah deputy prime minister a lo ni tawh.
Russian kum 54 mi hian kum 2018 khan president inthlanah Georgios Makropoulos hnehin FIDE president dinhmun hi a luah a ni.
Khawvel chess champion vawi nga ni tawh leh kum 2022 atanga FIDE deputy president ni bawk, Anand-a hian FIDE charter article 19.2-in a tar lan angin president dinhmun a luah ta a. FIDE chuan thuchhuah siamin he thu hi an nem nghet.
“FIDE Council chuan Arkady Dvorkovich-a’n president a nihna anga a dikna chanvo, a mawhphurhna leh a thuneihnate chawlhsan tura thutlukna a siam chu a pawmpuiin a nemnghet a ni,” an ti.
“FIDE Charter article 19.2-in a tar lan angin FIDE Deputy President Anand chuan Arkady Dvorkovich-a’n Swiss leh EU dan hman mekte hnuaia khuahkhirhna a la tawh chhung chu interim president (president lailawk) hna a thawk ang,” tiin FIDE chuan thuchhuahah an tar lang.