Aizawl: Supply Minister hlui K Lalrinliana chuan ZPM sorkar chu sorkar hmasa tih tihthatte mahni tih anga sawiah a puh.
Nimina Mizo Hnam Run chhung inkhawmah thu sawiin MNF adviser ni bawk, K Lalrinliana hian, “India ram state-ah oil depot nei lo awmchhun kan ni a, kan hun lai khan neih ve tul kan ti a. A hmun turte Bairabi-ah ruahmanna kan siam fel a. Aizawl chhak lamah awm se tiin anmahni lamin an rawn rawt leh a. Department hrang hrangte nen kan tifel a. A tak ram kan thleng tep a, inthlan a lo hun leh ta mai si a. Union minister-in hawng se tiin prime minister hriatpuinain rawtna kan siam a. Hmanni lawka session-ah minister-in a chhanna kha a mak ka ti, ‘Prime minister hawntir an tum a,’ a ti a, vawi khat mah PM in hawng se tih kan sawi lo hrim hrim. Hna thawk ho lutuk leh engmah ti lo angah min puh kha a mak hle mai,” tiin, sorkar hmasa thil tih that pawh an tih angin an sawi duh zel tih a sawi.
K Lalrinliana chuan, “Kolasib hospital pawh Pu Thangtea khan hawngin, a hna pawh thawh zawh deuh thaw tawh a ni a, an bul tan angin press release an siam ngamte kha a mak ka ti. Rice mill kan hawn tawh hun rei tak kal pui tawh pawh an sorkar tharah an hawng thar leh,” tiin, ZPM sorkar thar chu kalphung hlui ai pawha tenawm zawk a tih thu a sawi.