Aizawl: Urban Development & Poverty Alleviation Department (UD&PA) buatsaih, ‘Sanjha Utsav (SHG Mela) Festival of Togetherness’ chu nimin khan UD&PA Minister K.Sapdanga’n a hawng.
Self Help Group (SHG) Mela hawnna, Aijal Club Park-a neihah K Sapdanga chuan UD&PA department kaltlanga khawpui chhunga chhungkaw khawsak dinhmun chawikan nana nu hovin an theihna leh thiamna chhungkhawma a huho a hma an lak thinna chu lawmawm a tih thu a sawi a. SHG-te tihmasawn zel tur hian UD &PA department thawktute chu an inpeih reng thu sawiin; hetih rual hian, SHG-ten an tih ve tur, loan rulh ngaih pawimawhte, an hmalak dan tur ruahmanna felfai siam te leh thawhhona boruak tha siamte hlenchhuak zel turin a fuih bawk.
He hunah hian UD&PA Secretary Lalmalsawma Pachuau chuan kalkhawmte lawmna thu a sawi a. UD&PA Director Jacob Lallawmpuia chuan report a pe bawk.
SHG Mela hawnna hunah hian SGH hma la tha panga – Chawngtinleri SHG, Jenny SHG, Mass SHG, Nui hiau SHG leh Sari SHG-te hnenah lawmpuina thilpek hlan a ni.
Mela hi March 10 -14 thleng neih a ni dawn a, SHG kutchhuak thil chi hrang hrang phochhuahna stall 27 leh ei tur zawrhna stall pasarih a awm a ni.