Aizawl: Parliament Budget session thawh hnihna tan ni, nimin khan Mizoram Rajya Sabha MP K.Vanlalvena chuan NIT Mizoramin hun rei tak atanga harsatna a tawh a sawi.
K Vanlalvena chuan Mizoram NIT chu VNIT Nagpur atanga bul tan a nih hnuah, July 2011-ah Mizorama sawn luh a nih thu sawiin, a din tirh a nih atanga tun thlengin mahni puala building la nei lovin hmun hrang hrang Durtlang, Chaltlang leh Tanhrilah te mi mal building luah a la ngaih thu a sawi.
NIT Mizoram chuan building sa tura an inbuatsaih tan laiin NIT ram Lengpui chu Riverine Reserved Forest chhung ami ani tiin, Forest Dept atangin complaint a luh thu leh NIT chu sum tam tham tak chawi tura Forest-in an phut avanga harsatna tawk an nih thu a sawi bawk.
He harsatna sutkiansak tura Union Minister of Forest and Climate Change Bhupendra Yadav hnena a ngennate tihhlawhtlin a nih avanga lawmthu sawiin, NIT Mizoramin Forest Dept hnena pawisa a chawi tur zat chu nasa taka tihhniam ni tawh mah se, Mizoram sum harsatna hriatsak a, a bo a bang awm lova nuai bosak turin sorkar laipui a ngen.