Chapchar Kut lawmna pui ber Lammual a neihnaah khan Kut Pa, chief minister Lalduhoma chuan mizo nun ze mawi hrang hrang sawiin, Kut thupui nena inhmeh tak tak a rawn sawichhuak a, ngaithlatute beng pawh a fah hle niin a hriat.
Kan ram hruaitu lu berin kan pi leh pute tih dan leh nun dan mawi hrang hrang a sawi kha a lawmawm a, thangthar zawkte hian vawn a, zawm thar hi kan mamawh leh tawh hle reng a ni.
Mizote nunphungah hian hnamdang neih loh leh hriat ve loh tam tak a awm a, tlawmngaihna leh aia upate zahna kan neihte phei hi chu hnamdang laka inchhuanna tham a ni reng bawk.
Heng kan pi leh pute atanga nun dan mawi kan neih hrang hrangte hi bosal leh mausam a ni chho tan mek niin a lang a, kan inenfiah a tul tawh hle.
Kut Pa thusawite kha ngaithla nawn fo ila, kan ram leh hnam kawng dika a kal zel theihna turin sorkar pawhin ngaihtuahna hmang zel se, mipui lamte pawhin kan zo nun ze mawi – hawihhawmna hi i tung ding reng zel ang u.