AZL: Chief Minister Lalduhoma chuan Mizoram sorkar hian Uniform Civil Code (UCC) hman tumna a neih loh thu leh UCC hmang tura an rawn barh luih tum pawhin theihtawpin an tang dawn tih a sawi.
Assembly Budget session neih meka nimina zawhna leh chhanna huna Tuivawl bialtu MLA, Leader of Opposition Lalchhandama Ralte zawhna chhangin Lalduhoma chuan, “UCC hi an tih lai pawh khan a dodal nasa bertu kan ni a. Khatih laia kan aiawhtute khan kan duh ang tawka na khan an dodal lo niten kan hria a, vote-puite pawh awm deuh ni khan kan hria a, a tha lo kan ti a. Chuvangin, min rawn barh lui an tum pawhin theihtawpin kan tang ang a. Article 371G phena kan him turah pawh kan ngai a. Sorkar chauh ni lovin, NGO-te nen chutiang thil a lo thleng a nih chuan kan tangho dawn nia,” a ti.