Aizawl: Chief Minister Lalduhoma chuan ramria zalen taka inkalpawh an duh rualin, central sorkarin Free Movement Regime (FMR) an titawp chu a tulna leh that zawkna laite a awm ve nia an hriat thu a sawi.
Thawhtannia Assembly Budget Session neiha Leader of Opposition Lalchhandama Ralte zawh belhna chhangin chief minister chuan ramria zalen lutuka inkalpawh hian thil tha lo tam tak a keng tel tih sawiin, “Tunah hian smuggling tamzia kan hria a. Tualthahna leh eng eng emaw a thleng a. Zalen lutuka kan inkalpawh hian thil tha lo tam tak an thlen,” a ti.
Lalduhoma chuan, “Kan unaute raltihna avanga lo lutte chu kan enkawl tur a ni meuh a. Mahse, ral lehlamah, an khua hmuh phak rengin a awm a, a ralmuang a, haw tum tawh lo eng emaw zat an awm a. Chutiangte a nih avangin zalen lutuka kan inkalpawhte hian thil tha lo tam tak silai, silaimu leh a dangte a keng tel,” a ti.
Sual rawngbawl leh tualthahna lo thleng se, kar lovah ral lehlam kai leh mai theite an ni tih sawiin chief minister chuan, “Zalen taka an awm hi mipui tam tak pawhin a tha lo zawk emaw ni an ti a; chuvangin, keini duhdanah chuan zalen takin inkalpawh thei ila,” tiin central sorkarin a rawn tih takah chuan a tulna leh that zawkna laite hi a awm vean tih thu a sawi.