Aizawl: Thawhtannia Mizoram Budget Session-ah Chief Minister Lalduhoma’n Lawngtlai West bialtu MLA C. Ngunlianchunga chu a vau nia sawiin, hei hi MLA-ten house chhunga zalenna an neih hmang ngam lo tura vau beh tumnaah an ngaih thu sawiin, MPCC chuan chief minister chu thupha chawi turin an phut.
Nimina thuchhuah an siamah Congress party chuan, Mizoram Legislative Assembly Session neih mekah chief minister, House leader ni bawk Lalduhoma’n MLA C Ngunlianchunga’n LADC CEM V. Zirsanga chungchang a chhannaah, a zawttu MLA anticipatory bail la tura hrilhin vauna thu a chhak chhuak chu, Assembly Session-ah tunhma a thil thleng ngai lo leh la hmuh ngai loh, mahni MLA-puite vauna a nih thu an sawiin zahthlak an tih thu an sawi.
Congress party chuan, he thil hi MLA zahawm takten house chhunga zalenna an neih hmang ngam lo tura vau beh tumnaah an ngaih thu sawiin, hetiang thil hi Mizoram Legislative Assembly session-ah hian thleng ngai tawh lo se an duh thu sawiin, Chief Minister Lalduhoma hian C. Ngunlianchunga hnenah leh Assembly House chungah tunhnu a House zahawm nan thupha chawi tura an phut thu an sawi.
MPCC chuan kumin Chapchar Kût-ah khan CM hian ‘Hawihhawmna’ tih thupui hmangin thu a sawi a. Pi pute hawihhawmzia leh tunlai thangtharten entawn se a duh thu a sawi hnu lawkah tawngkam dengkhawng tak Assembly House-ah a hmang leh mai hi House Leader tawngkam tur nia a lan loh thu leh thangtharte entawn tura a sawi chu amah ber hian a mamawh ber nia an hriat thu an sawi bawk.
Congress party chuan V. Zirsanga hi eiruk thubuaia court in thiam loh a chantir tawh, cheng nuai li chawia kum li jail tang tura hrem mek, bail a chhuah lailawk a nih thu sawiin, “Kan CM leh a naute ZPM MLA ten hetia na taka a thlavang an hauh hi corruption an huat tak tak loh zia lan naah kan ngai a. CM-in mi dang pir tel ranin a thlavang hauh mah se, ZPM Val Upa Council ten corruption case-a court in a convict tawh lakah hian engtin nge hma an lak dawn Zoram mipuiin an thlir mek a ni,” an ti.