Iraq leh Syria-a Islamic State (IS) pawl hruaitu hlun tak chu Iraqi national intelligence service leh US kaihhruai tangrual chuan an that tih Iraqi prime minister-in a sawi.
Abu Khadijah tia hriat bawk, Abdallah Makki Muslih al-Rifai-a hi ‘Iraq leh khawvela firfiak hlauhawm ber’ tiin Prime Minister Mohammed Shia al-Sudani chuan a sawi.
US President Donald Trump pawhin ‘pasalthaten rimn taka an beih hnuah an dah tha ta’ tih a puang.
US Central Command (Centcom) chuan Iraq khawthlang lama Al Anbar province-ah an tum tak kap fuhin IS member zinga ‘pawimawh tak pakhat’ chu Ningani khan an that tih an sawi.
Rifai-a hi IS-a thutlukna lian siamtu zinga hotu niin beihpui thlak, awmna tur ruahman leh khawvel puma IS hmalakna tur ruahmantu a ni tih US Central Command chuan a sawi.
An pawl sum chevel lian takah pawh thu a nei bawk tih Centcom chuan a sawi.
Rifai-a hi IS dang pakhat nen a ruang hmuh a ni tih an sawi a. “Firfiak pahnih hian la puak lo ‘suicide vest’ an lo la inbel a ni,” a ti.
Centcom leh Iraqi sipaite hian a hmaa an thah tep tuma a DNA an lak atangin an finfiah.
Gen Michael Erik Kurilla chuan, “Kan ram leh US thawhpui leh tanpuite tibuaitu mi firfiakte leh an pawl hi kan chhu chhe zel ang,” a ti.
IS hian thawk khat lai khan Syria hmarchhak atanga Iraq hmar lam ram acre 88,000-a zau an thunun hman a, mi maktaduai riat vel chungah khawng takin ro an rel.
Iraq chuan December, 2017 khan chhut chimih an nih thu puangin kum 2019 khan an awp chin ram zim te pawh an laksak.