Chief Minister Lalduhoma chuan Aizawl khawpui lailia Assam Rifles hmunte sorkar kuta hlan a ni ta chu Mizoram leh hnam tan thil chhinchhiahtlak bik a ni tih sawiin, Union Home Minister Shah hming chu Mizote awm chhunga hriat zui reng a nih tawh tur thu a sawi.
Inrinnia 23rd Sector Assam Rifles, Khatla-a Mizoram sorkar aiawh leh Assam Rifles aiawhten Aizawl khawpui chhung atanga AR-te an chhuahsan tur map inthleng tawnna inkhawmah thu sawiin chief minister chuan hun rei tak atanga an lo buaipui tawh Assam Rifles sawn chhuah an nih theih nana hma a lakna te avangin Union Home Minister Shah chungah te, Director General, Assam Rifles Lt. Gen Vikas Lakhera chungah te, Union Home Secretary Govind Mohan leh Tapan Deka, Director, IB-te chungah lawmthu a sawi.
Lalduhoma chuan khawpui lailia Assam Rifles hmunte Mizoram sorkar kuta hlan a ni leh, Zokhawsang hmuna an insawnna tur map Assam Rifles kuta hlan a ni ta chu, Mizoram leh hnam tan thil chhinchhiahtlak bik a nih thu a sawi a. Shah hming chu Mizote awm chhunga hriat zui reng a nih tawh tur thu a sawi.
Chief minister chuan Mizoram chu tlangram a ni a, Aizawl khawpui hi a thang chakin mipui an pung chak si avangin vantlang hmun indaih lohnate, hmasawnna ruhrel lam indaih lohnate a nasat avangin, khawpui laili taka awm Assam Rifles hi hmun dangah suan mai ni se tih hi mipui thinlungah hun rei tak a lo awm tawh tih a sawi.
Assam Rifles hi khawpui laili atanga an insawn chhuah avang hian Mizoram sorkarin a thlahthlam ngai dawn lo tih sawiin chief minister chuan, “Assam Rifles nen kan thawhhona hi keng nung zel ila ka duh a, kan ram himna leh muanna atana an thawhna pawh chhunzawm zel turin ka ngen a. Mizoram sorkar chuan kawng engkimah a tulna apiangah thawhpui zel dawn a, kan thlahthlam ngai dawn lo a ni,” a ti.
October 23, 2024 zan dar 7 khan, New Delhi Mizoram House-ah Assam Rifles leh Mizoram sorkarin Assam Rifles-te Zokhawsanga an insawnna tur inremna (MoU) an ziak fel a ni.