Aizawl: Mizo infiamna chawilarna atana buatsaih, Mizoram Indegenous Games chu Mizoram district hrang hranga buatsaih a nih hnuah, March 19-21, 2025 chhung hian Aizawl Chaltlang field-ah Chaltlang Branch YMA-in grand finale an thleng dawn.
Thawhtanni khan Doordarshan Mizoram Indigenous Games 2024-2025 (DD MIG) Producer T. Siama chuan Mizo hnam infiamna ral mai tur chawilar nan sorkar laipuia sum an dilte hmangin, Mizoram Indigenous Games Association (MIGA) te nen thawkhhoin hma an lak thu a sawi a. Nikum State Day khan Serchhip-ah bul tanin, district capital tinah hlawhtling takin an nei chhoh hnuah, March 19 atang khian district tina infiamna an buatsaiha a tithaten Grand finale an nei dawn tih a sawi.
T Siama chuan, Mizo infiamna chi nga, mipa inelna item thum — inbuan, insuknawr, insaihruipawh leh inarpathai bakah, hmeichhe tangho member pasarih awmna inelna inkawibahah te inelna neih a nih tur thu a sawi a. Item tinah hian lawmman pakhatna atanga palina thleng bakah, he intihsiaknaa tel ngei, lawmman dawnglo te tan consolation prize pek an ni vek dawn a. Aizawl district pawn lam player tan TA pek a nih tur thu a sawi bawk.