- Isaak Roluahpuia; JF Cottage, Shillong
JK Rowling khân a lehkhabu hmasa ber ‘Harry Potter and the Philosopher’s Stone’ a tih chhuah dáwn khán vawi 12 zet publisher-te’n an hnâwl a. A tàwpah Bloomsbury-in an publish-sak hram a. Mahse, khawvêla ziak mi lar ber leh ziak mi zínga billionaire hmasa ber a rawn ni ta a ni.
Stephen King-a hre lo hi kan awm àwm lo ve. A lehkhabu (novel) hmasa ber Carrie kha publisher 30 chuangin an hnáwl a. A beidawng lutuk chuan a manuscript chu bawlhhlawh báwmah a paih hial a. Mahse, a nupui Tabitha-i chuan beidawng lo tùrin a fuih a. A tàwpah chuan Carrie chu publish a ni ta ngêi a, bestseller a rawn ni chho va, history-ah hian Stephen King-a hi hming a dài tawh lo vang.
‘Queen of Mystery’ emaw, ‘Queen of Crime’ ti-a khawvêlin a hriat Agatha Christie kha a vawi khatnaah a hlawhtling bîk mai lo. A lehkhabu hmasa ber ‘The Mysterious Affair at Styles’ kha vawi 6 zet hnâwlsak a ni a. Hmeichhia a nih vàng te pawh a ni ang, an lo iai a ni. Mahse, History chu kan hria e! Detective thawnthu 66 zet a ziak a, short story collection 14 a ziak a. A lehkhabute hi billion 2 chuang zet print a ni tawh a. Shakespeare-a leh Bible copy zât zet a lehkhabute hi chhut a ni tawh.
William Golding-a lehkhabu’ Lord of the Flies’ kha publisher 21 zetin an lo hnâwlsak a. Mahse, William Golding-a chu a beidawng duh lo va, a ziak zel a, a bei zel a. A tàwpah chuan Nobel Prize, Literature-ah a dawn phah ta daih asin le!
Herman Melville-a lehkhabu ‘Moby Dick’ hi a hun lái chuan mi tam takin an sawisèl a, Melville-a nun ngêi pawh khán a tuar a. Rilru harsatna hial a thlen a ni àwm e. Mahse, a boral hnû-ah a lehkhabu chu mite’n an han belhchian chuan an dah sáng ta viau mai a. American Literature-a lehkhabu ?ha ber leh ropui ber, a sulsutuah an ngái a ni.
George Orwell-a ‘Animal Farm’ hi a tìrah chuan an lo pawm lo nasa mai a, publisher eng emaw zâtin an lo hnâwl a. Publisher pakhat phei chuan, “Ramsa thawnthu an zuar ngai lo,” a lo tih khum hial a. Mahse, vawiinah chuan George Orwell-a lehkhabute chu khawvêla lehkhabu hming thang ber an lo ni tâ a, Animal Farm leh 1984 phei chu lehkhabu hralh tla ber páwl a rawn ni ta a ni.
Chuvàngin, beidawng suh!