Ruihhloin nasa takin kan ram min run a, a hre deuhte sawi dan phei chuan ruihhlo kalkawng dik tak kan ni bawk.
Ruihhlo tawlh avanga mihausa leh kohhran leh khawtlanga mi langsar tak tak, zahkai han ni pha hialte pawh an awm tawh zawk hial mai thei.
Chuti khawp chuan ruihhlo hian min luhchhuah hneh a, kan ram thalai tam tak a nghaisa a, chhungkaw tam tak rumna chu a va ni teh reng. Kan tu leh fate tana chenna tlak lohah kan ram hi ruihhloin min chiah piah thuai a hlauhawm hle a, tun atanga nasa lehzuala ti lo tura kan infuih hi a ngai tawh hle.
A siamna hmun pui lama miten an titawp thut phalin a rinawm loh a, chutiang a nih avang chuan a kalkawng hi kan la ni chho zel pawhin a rinawm, tin hausakpuite pawh an la awm zel mahna!
A buaipuitu leh man theitu lam hi kan thuam chak a ngai hle tawh a, a that lohzia inzirtirna hi kan inpek mawlh mawlh a tul tawh hle. Tha thlah lova kan chet ve thuai thuai hi a tul tawh tak zet a ni.
Sorkar pawh hian hemi kawngah hian a man theitu leh dan leh dun kengkawhtu lam hi thuam chakin, beihpui thlak lehzual se la, hremna dan na zawkte pawh hi siam ngam lehzual se a tha hle.
A ti ve lote thlenga buaina thlentu ruihhlo hi thapui thawha kan do leh kan huat hi a tul tawh tak zet a ni.