Aizawl: MPCC Spokesperson Dr Lallianchhunga chuan nimin khan Saitual tlangdunga khaw hrang hrang, Ruallung, Mualpheng, Tawizo, Maite leh Lenchim-te tlawhin sawhthing hralh dan a enfiah; sawhthing lei dan turah ZPM ten research based-a zir chianna an neih lohzia a taka a hmuh thu a sawi.
Dr. Lallianchhunga chuan sawhthing chingtute harsatna tawh mek hi dawhkan nalh tak leh thutna nuam taka thu ZPM sorkar hotu ten an hriat chian loh zia a takin an hmu zel tih sawiin, “Sawhthing lei dan turah ZPM-ten research based a zir chianna an neih lohzia a takin kan hmu bawk a ni. Sawhthing chingtute hi patling an ni a, an tap lo a ni mai, an lung erawh a chhia a ni,” a ti.
ZPM sorkar hotu leh Chief Minister ten thu thlum tak tak sawi reng mah se, kuthnathawktute harsatna an sut kian sak loh chuan awmzia a awm lo tih sawiin Dr Lallianchhunga chuan “April fool hi ZPM sorkar hnuaiah kan hmang reng ang tih hlauhawm tak a ni,” a ti bawk.
ZPM sorkarin sorkar kum thar, Financial Year a cheng vbc 900 chuang an luh pui anga ZPM in thuchhuah an siam chungchang sawi langin Dr. Lallianchhunga chuan, Rs vbc 900 chuang sorkar kum hlui atanga sorkar kum tharah luhpui anga an insawi hi a dik takzet a nih chuan sawhthing, hmunphiah leh an thlai thlan bik te hi ZPM sorkar hian chhuanlam dang siam loin, an intiam ang ngeiin leisak vek turin Congress party chuan an phut tlat thu a sawi.