Chief Minister Lalduhoma chuan nimin zing khan Zuangtui venga PWD hmunhma leh Zemabawka RIPANS College panna kawng a enfiah.
Zuangtui khawtlang hian an venga sorkar Middle School leh Primary School, lei tlahniam huam chhunga hun rei tak awm tawh, thawm that zui zel atana him tawh lova ngaih sawnna atan PWD ram thenkhat chu ruahman turin sorkar an ngen a. An dil hmun hma hi chief minister hian a en fiah a ni.
He mi zawh hian Regional Institute of Paramedicals & Nursing Sciences (RIPANS) College panna kawng, sorkarin siam that tura thu a lo dah tawh chu a tlawh bawk.
Chief Minister chuan Zuangtui PWD ram, school hmun atana Education department hnena pek thu hi dan anga dilna te theh luh a nih hnuah la ngaihtuah zui tur a nih thu a sawi a. RIPANS panna kawng pawh hi a rang lama siam a nih tur thu a sawi.
He hunah hian Chief Minister hi PWD Minister Vanlalhlana leh bialtu MLA, Lalthansanga ten an tawiawm.