Aizawl: New Delhi-a Central Institute of Educational Technology (CIET) chu nimin khan School Education Minister Dr. Vanlalthlana’n tlawhin, National Council of Educational Research & Training (NCERT) hotute a kawm.
An inkawmnaah hian Information & Communication Technology Minister ni bawk Dr. Vanlalthlana chuan, sorkar thar a pian hnua an hna hmasa ber pakhat chu aikal chhawr tihtawp leh pisa kai hun chhung en thlithlai a nih thu sawiin, hemi atana hmanraw tha ber chu technology a nih thu a sawi.
Mizoram sorkarin Kai app a hman dante sawi bawkin, VSK nen zirtirtute hman bik tura thlun zawm (integrate) tum mek a nih thu a sawi a. Mizoram hmasawn ngaihna tur ni a an hriatte chu a hnena thlen hreh lo turin a chah a; School Education department hnuaia thawktute nen theihtawp chhuaha bawhzui zel an inhuam thu NCERT hotute a hrilh.
He hunah hian NCERT-in zirna hmanrua pangngai piah lama zirtirna (alternative learning system) an kalpui dante, DIKSHA portal kaltlanga digital education content siama dah chhuah a nih dante bakah zirlai leh zirtirtute tana educational technology hman tangkai a nih dante leh, ram pum huapa VSK kalpui a nih dan leh Mizorama hman a nih dante an sawi ho bawk.