Aizawl: Kumin Republic Day lawmna pui ber, New Delhi-a Mizoram atanga Republic Day Camp 2025-a telte hnenah Mizoram Larsap Gen. Vijay Kumar Singh chuan nimin khan Raj Bhavan-ah lawmpuina thilpek a hlan.
Mizoram atanga Republic Day Camp 2025-a telte hi Mizo NCC Cadet paruk, mipa pali leh hmeichhe pahnihte an ni a, larsap hian lawmpuina thilpek atan tablet a hlan a ni.
Republic Day Camp 2025-a Mizoram atanga telte hi 1st Mizo Battalion NCC atangin Junior Under Officer Jacksy Lalhlimsangi leh Cadet Laltlanhlua; 2nd Mizo Battalion NCC atangin Cadet Asraful Haque Laskar; 1st Mizo Air Squadron NCC atangin Cadet Rohit Kumar, Cadet F. Malsawmtluanga leh Cadet Lalremruati te an ni.
NCC Cadet te hi ngaihhlut hlawh tak Kartavya Path, PM Rally, Line Area leh Youth Exchange Programme (Cultural)-ah te an tel a ni.
Nimina hun hmanah hian Colonel SS Kalia, Nodal Officer, NCC Mizoram & Commanding Officer, 1st Mizo Bn NCC, Wing Commander Lalrinsanga, Commanding Officer, 1st Mizo Air Squadron NCC-te an tel a ni.