Cristiano Ronaldo chu Spanish club lian neitu ni thei dinhmunah a ding mek a, chutiang dinhmuna ding tur chuan thil ngaihchan ngai pakhat erawh a awm thung.
Vawi nga ngawt Ballon d’Or dawng thei, Ronaldo hi Spain rama football league lian berah kum kua ngawt a awm hman a, Real Madrid player ropui berte zinga mi niin record a siam hnem hman hle.
Kum 2018 nipui laiin Bernabeu chhuahsanin Juventus a pan a, tunah chuan Saudi Arabia-ah awmin Al-Nassr player a ni mek a ni.
Spain-a chanchinbu lar tak, Mundo Deportivo chuan Portuguese forward kum 40 mi hi La Liga club lian, Valencia lei thei tur dinhmuna ding mek niin an tar lang a. Ronaldo hian he club leina atan hian ama pawisa mai bakah Saudi mi hausa pawisa a hmang tel dawn niin an tar lang.
Valencia a lei hma hian Ronaldo chuan season thara La Liga khel thei tura an la inham tan theih dawn leh dawn loh a ngaichang hmasa niin reporter Julian Redondo chuan a sawi.
Ronaldo emaw, a aiawhte emaw chuan he mi chungchangah hian engmah sawi chhuah an la nei lo a. Valencia hi La Liga season kal mekah 15-na an ni a, relegation zone atangin an la him rih lo a. 18-naa awm, Leganes leh 19-naa awm, Las Palmas te nen an inthlauhna chu point li leh point nga chauh a ni a, eng thil pawh a la thleng thei a ni.
La Liga-ah Valencia hi inham tang thei loin Segunda Division-ah an tla thla a nih pawhin Ronaldo tan hian lei chu a awlsam chuang kher lo mai thei niin an sawi a. Thla hmasaah khan club chairman Peter Lim chuan hralh tumna an neih loh thu chu chiang takin a lo sawi tawh a ni.