Kum khat pawh la liam lova mipuiin Prime Minister Sheikh Hasina-i paih thlakna tura nasa taka lungawi lohna an lantir hnuah Bangladesh kawtthlerah mipui an pungkhawm leh ta a, tun tum chu Palestine thlawpna a ni thung.
Police chuan hmun hrang hranga mi thil suasamna thleng avangin mi 56 an man tawh.
Palestine thlawpna lantira pungkhawmte hian sumdawnna hmun thenkhat, KFC leh Domino’s Pizza dawrte pawh an suasam niin thuneitute chuan an sawi tih news agency PTI chuan Thawhlehni khan a tar lang.
Mi dawng suasamna hi Thawhtannia thleng kha niin Nilaini atanga Chief Adviser Muhammad Yunus-a kaihhruai sorkar lailawkin ni li awh tur international investment summit an thlen hma lawka tih a ni.
Summit-ah hian khawvel hmun hrang hranga entrepreneur-te Bangladesh-a lut tura hmin tuma beih a ni ang.
Thawhtanni khan Palestine thlawpna hi Bangladesh-a hmun hrang hrangah lantir niin Israeli-ten Gaza an beih duh lohna an lantir bawk.
Tharum thawh lova hun eng emaw chen an kalpui hnuah mi thenkhatin ram dang atanga lut – Bata Shoe, KFC leh Domino’s Pizza dawrte chu Sylhet, Chattogram, Khulna, Barishal, Cumilla leh Dhaka-ah an bei ta niin thuneituten an sawi.
Police-te chu a beitute zawng hian zankhuain an thawk chhuak niin Chief Adviser Press Secretary Shafiqul Alam chuan thuthar lakhawmtute hnenah a sawi.
“Tunah hian mi 56 vel man an ni tawh,” a ti a. Thuneitute hian dawr suasamnaa inhnamhnawih chhui nan hian video footage hrang hrang an en tih a sawi.
Tharum thawhna thlenga inhnamhnawihte hi an man kim hma chu an um zui zel dawn tih a sawi bawk.
Prime minister hlui, Khaleda Zia-i kaihhruai Bangladesh Nationalist Party (BNP), Islamist pawl, pawl dang leh political party hrang hrangte chuan Thawhlehni pawh khan Israel duh lohna an lantir a, buaina erawh a chhuak lo.
Police chuan venhimna khauh takin an kalpui bawk.
BNP hian Thawhtannia tharum thawhna thleng chu an dem thu sawiin sorkar chu dan leh thupek kengkawh tha lovah an puh.
Nikum August 5 khan Prime Minister Hasina-i chu rei tak mipuiin amah duh lohna lantira tharum thawhna pawh nasa taka a thlen hnuah bângin helicopter-in a laizawnnu nen India an pan nghal a ni.