Aizawl: Japan Embassy kaltlanga Mizo thalaite tana hamthatna awm thei hrang hrangte sawipuiin nimin khan LESDE Minister Lalnghinglova Hmar chuan Japan Embassy-a first secretary pahnih – Hagiwara Ryusuke leh Tsubakimoto Mayumi te a kawm.
Mizoram House, Chanakyapuri-ah an inkawmnaah hian Lalnghinglova Hmar chuan Mizoram chu state lian lo, workforce pawh tam lo ni mah se thalaiten thil an thiam chak a, a bikin kum upa tamna ram Japan-in a mamawh heng – nursing, care-giving leh hospitality sector-ah te Mizo thalai theihna a sang tih a sawi. “Japan-in demand a nei a, keini’n supply kan nei thung. Tun hnaiah LESDE department hmalaknain Mizo thalai eng emaw zat chuan Japan ramah hna an thawk tawh a, hei aia lian a kalpui kan duh,” tiin, Japan embassy chu thawhpuiah a sawm.
Lalnghinglova Hmar chuan Mizo thalaiten Japanese culture an ngaihven tih sawiin, “Mizoram chhunga huihawt cosplay-ah pawh kan thalaiten Japanese culture pho lan an uar hle. Hei hi intihhlimnaa tawp mai lovin eizawnna tling, Mizoram leh Japan thlunzawmna hmanrua pakhat ni thei se kan duh,” tiin Japanese organization-te nen thawhho a duh thu a sawi bawk.
Sports minister ni bawk, Lalnghinglova Hmar chuan Mizoramin Olympic 2036 vision a nei a, Olympic sports discipline thlanchhuahah JICA atangin Mizoramin sports coach a dil mekte chu a tul anga bawhzuisak turin a ngen.
Japan Embassy official-te chuan Mizoram leh Mizo thalaite chanchin chu ngaihnawm leh phurawm an tih thu an sawi a. India state dang te nen khaikhinin Mizoram atanga Japan rama hnathawk an la tam lo hle a, Mizo thalaite tana sorkar hmathlir hrang hrang tihlawhtling turin thawhpui an inhuam reng tih leh, a bikin caregiving leh nursing sector ah Mizo thalaite theihna an hre tawh tih minister an hrilh.
Infiamna leh cultural exchange hmanga Mizoram leh Japan thlunzawmna nghet zawk zawn tha an tih bakah India chhung leh pawna Japanese organization-te nena thawhho kawngah pawh theihtawp an chhuahpui tur thu an sawi.