Indian wrestler Vinesh Phogat-i chu Paris Olympics 2024-ah khan final thleng mah se an disqualify zui ta daih a. Heti chung hian Haryana sorkar chuan silver medal la anga an ngaih thu sawiin lawmpuina Rs. Vaibelchhe 4 an pe ta tho.
BJP kaihhruai Haryana sorkar chuan Phogat chu duh thlan tur an chhawpsak a, in hmun pek emaw, Group A sorkar hna pek emaw, Rs. Vaibelchhe 4 pek emaw an tiam a, heng zingah hian sum chu a thlang.
Haryana sorkar hian India rama hmeichhe wrestler zinga lawmman dawng hnem ber an lawmpuina hi Haryana Shehri Vikas Pradhikaran (HSVP) atangin an ruahman a. Lawmpuina pawisa fai pek hi tiam mah se a taka pek erawh a ni mai lo a, Phogat chuan hun eng emaw hnuah a sawi chhuak a, sorkar chuan pawisa hi an pe ta a ni.
Infiammi hlawhtlingte lawmpuina pek chungchangah Haryana sorkar hi an thil phal thin hle a, Olympic gold medal la thei chu Rs. Vaibelchhe 6 pek an intiam a, Olympic silver medal late chu Rs. Vaibelchhe 4 pek tiamin, Olympic bronze medal late chu Rs. Vaibelchhe 2.5 pek an tiam a ni.
August, 2024-ah khan Paris Olympics-ah Phogat-i chuan Olympic final a lut a, India hmeichhe wrestler zinga hetiang dinhmun thleng thei hmasa ber hi a ni a. Final an khelh hma deuhin a rihna an endik a, kg 50 chu 100 gram-in a lo pel a, hei vang hian United World Wrestling inkaihhruaina dan a bawhchhia tiin an disqualify a ni.