Chinese thuneitute chuan US President Donald Trump chu ‘reciprocal tariff’ tia a sawi, an rama bungraw lak luh atanga chhiah a lak a tihsan chu ‘a zavaiin titawp leh’ turin an ti a, khawvela economy lian ber pahnih hi sumdawnnaah lamah an indo mek zel.
Kar liam ta khan Trump-a hian ram hrang hrang atanga bungraw lak luh man a tihsanna chu ni 90 chhung an hmang leh rih dawn lo tih a puang a, Chinese bungrua bik erawh 145%-in a tisang.
“US hi rahbi an rah sual palh hi titha leh turin kan ngen a, ‘reciprocal tariffs’ a tihsual palh hi tidikin kawng dik zawk zawh lehnghal turin kan ti a ni,” tiin China-a commerce ministry chuan Pathianni khan thu a chhuah.
Trump-a sorkar hian Zirtawpni khan China siam chhuah thil thenkhat, electronic thil chu an ngaihhnathiam thu a lo puang tawh.
Hetih lai hian US Commerce Secretary Howard Lutnick chuan Pathianni khan heng ngaihhnathiam pawh hi hun rei lo (temporary) atan chauh a nih thu ABC News hnenah a sawi.
Electronic thila ngaihhnathiamna pawh hi President Trump-a chuan an sawi ang hi a ni vek lo tih social media-ah a sawi leh a. Ngaihhnathiam ni lovin kalpui dan tur dang an nei mai chauh zawk niin a sawi.
“Semiconductor leh electric thil inpek kual dan hi nakina National Security Tariff Investigations-in a en zui tur a ni,” a ti.
President thu sawi hian technology thil – smartphone, computer leh semiconductor-a ngaihhnathiamna an kalpui pawh hi engtin zel nge tih a ni dawn tih zawhna a siam.
Chinese commerce ministry chuan heng ngaihhnathiam hi chu ‘thil te tham’ a nih thu sawiin Beijing chuan ‘a nghawng thil a enzui dawn’ tih a sawi.
Trump-a sorkar chet dan hi khawvel ram lian pahnih inkarah thil tha lo zawk a thlen zel thei dawn nia ngaihna a lian tawh hle.
US Trade Representative Jamieson Greer chuan Pathianni khan Trump-a leh Chinese President Xi Jinping-a te chu inbiak tumna an la nei lo niin a sawi bawk.
Trump-a hian April thla tirah khan China atanga bungraw lak luhte atanga chhiah an lak chu 54%-in a tisang a, a hnuah 145%-ah a tisang leh.
China-in US bungrua lak luh chu 34%-in a tisang ve nghal a, 84%-ah kaitirin 125%-ah a kaitir leh a, hei hi Inrinni atang khan a hmang tan.
Tariff a tihsan chungchangah China-a commerce ministry chuan kar hmasa khan US-in a tihsan vak vak titawp tura a beihna niin a sawi.
Inrinnia Miami, Florida pana a zin kawngah Trump-a chuan ngaihhnathiam tur thilte chu tun karah a puan belh dawn tih a sawi.