Indian National Developmental Inclusive Alliance (INDIA) tangrual hruaitute chu Ningani khan October-November thlaa Bihar-a assembly inthlan lo awm tur thlirin Patna-a Leader of Opposition Tejashwi Prasad Yadav-a chenna inah an thukhawm dawn.
He thutkhawmah hian tangruala tel party tin hruaitu lawkte an tel dawn a. Heng zingah hian Congress leh left party-te pawh an tel a, Rashtriya Janata Dal (RJD)-in chief minister tur vawrh chhuah an tum chu eng angin nge an kalpui dawn tih pawh sawi a ni ang.
RJD hruaitu kaihhruaia thutkhawm turah hian Nitish Kumar-a kaihhruai National Democratic Alliance (NDA) paih thlak dan tur an sawiho dawn niin assembly-a Congress Legislature Party Leader Shakeel Ahmad Khan-a chuan a sawi.
“Inthlan hnuhnung berah khan Mahagathbandhan (MGB) khan vote 0.03%-a hmu tlemin sorkar kan siam thei lo chiah chiah a. Tunah hian mipuiten chi leh chi inkara inepna leh ei rukna, thil man sang leh kalphung mumal lo hi an ning tawh a ni,” tiin Khan-a chuan a sawi.
INDIA-a tel party dang hruaitute pawhin an thutkhawm tur hi ‘inthlan atana chet lak dan tur ruahmanna’ a nih thu sawi hlawmin a tahtawla bial dinna tur inchan sem dan tur leh NDA-a tel dangte pawh luh dan tur pawh an ruahman zel dawn tih an sawi.
“Hruaitute hian thil tum inangtlang kan neih tur te, hruaitua harsatna kan neihte tihfel te leh state puma tanghova lungruala campaign beihpui kan thlak dan tur te pawh sawi a ni ang,” tiin Congress hruaitu dang chuan a sawi bawk.
Hruaitute hian bial hrang hrang thlir zela ruahmanna, tual chhung mite harsatna leh an party an din lohna bialah pawh an inpuih tawn zel dan turte pawh sawi a ni dawn tih RJD hruaitu, Maner MLA Bhai Birendra chuan a sawi.
“Thil man sang, hna nei lo tam leh mi rawn pem lut nasa lutuk te hi thil langsar zual a ni a, hei hi state puma thil thleng mek a ni,” tiin Birendra chuan a sawi a. INDIA hruaitute hi chuan muanna leh inunauna a awm zel theihna turin hma an la dawn tih a sawi.
Birendra-a hian dinna tur bial inchan sem dan chu an buaina a ni lo tih a sawi a, hruaitute chuan hotu sang zawkte nen an la sawiho pawh a tul tur thu a sawi.
“Tun tum thutkhawmah hian state-level-a hruaitute an tel dawn a. Chief minister atana vawrh chhuah tur leh bial inchan sem dan tur chu national-level hruaituten an tifel dawn a ni,” a ti.
Congress atang hian an hruaitu hlun, Bihar Pradesh Congress Committee (BPCC) chief Rajesh Kumar, Congress Legislature Party (CLP) Khan leh Madan Mohan Jha te chu an tel dawn a ni.
Tejashwi Prasad Yadav-a kaihhruai turah hian left party an thawhpui atangin Communist Party of India (Marxist–Leninist) Liberation (CPI(ML)L) hruaitu Mehboob Alam pawh a tel dawn a. “INDIA hian bial 200 aia tam lak an tum a ni,” tiin Alam-a hian a sawi.