Aizawl: BJP Mizoram chuan nimin khan Dr BR Ambedkar pianchampha Dr BR Ambedkar Birth Anniversary vawi 135 pual lawmna inkhawm an buatsaih.
Upper Republic-a BJP Mizoram pisaa inkhawm buatsaihah Senior Advocate Lalramzauva chuan an hun hman chhan, hnam hnuaihnung leh India ram tana mi pawimawh tak ni bawk si Dr BR Ambedkar hi India ram tana mi ropui tak a nih thu a sawi.
Adviser to CM hlui Lalramzauva chuan, India danpui hi a ropui em em a, he danpui hi lal leh thuneitu angah ngaih chuan, a thu anga an awm a an inkaihhruai a ngai tih sawiin, “A thu anga kan awm lo a nih chuan hremna kan chungah lek theih a nih avangin, kan danpui hi kan zahin, mipui nawlpuite pawh hian theih ang anga kan hriat ve a ngai a ni,” a ti.
Danpui siamtu MLA-ten tih tur an nei a, police-in tih tur bik an nei bawk tih sawiin Lalramzauva chuan, “Chung mite chu kan tanruala kan thawh ho that a ngai hle. Kan ramah ruihhlo nasa takin a hluar a, hemi chungchangah pawh kan dan siamtu MLA te tih tur a awm a, dan kengkawhtu kan Police-te tih tur a awm a, dan anga roreltu tur court tih tur a awm bawk a, dan rorelna hi kan zaha kan zawm a nih chuan kan ram hian kan sawt pui hle dawn a ni,” a ti bawk.
Thu sawitu dang BJP Mizoram President Vanlalhmuaka chuan BJP hian India rama thil thleng tawh chanchin (history) hi ziah thar a tum lo va, history dik tak hi India mipuiin an hriata an hmuh theihnan hma an la tih sawiin, “Dr. BR Ambedkar piancham kan lawm hian, Dr. BR Ambedkar-a hmathlir hi BJP chuan thlen diktir tumin hnam hnufualte thliar hranna awm lo tur leh mi tu pawh intluktlanga kan awm theih nana hma lak hi kan tum ber a ni,” a ti.
BJP Mizoram Vice President JB Rualchhinga kaihhruai inkhawmah hian sawmte zingah Padma Shri Awardee B Sangkhumi, BJP State Vice President Vanupa Zathang, State President hlui Prof JV Hluna te pawhin thu an sawi.