Aizawl: Mizo damlai zinga upa ber Buangi (Lalneihsangi) chuan nimin (April 14, 2025) khan kum 108 a tling a. kum 109 a hmang tan a. A piancham hi a laina hnai ten an lawmsak.
Buangi hi Aizawl Venghnuaia piang leh seilian niin, an chhungkua hi The Salvation Army zawm hmasate zinga mi an ni a. A pa chu Thangchhunga CSM, Mizorama (Kohhran Upa) Corps Sergeant Major hmasa ber a ni a, Thakthing lal, Paliana Khawchhiar a ni.
Rev. Sena nupui Buangi hi Mizo zinga rehab-a thawk hmasate zinga mi a ni a, Behala Girls Home, Kolkata-a hmeichhe rahbi tleu leh, nu leh pain an kalsan naupang enkawlna hmunah a thawk thin a. Thiam thil tha tak neiin puan thui, puan tah leh la phiar a thiam hle. Tawng chi hrang panga a thiam bawk.
Kum 2022 khan Heritage Award buatsaih Mizo hmeichhe chhuanawm ‘Women of Substance’ hlan a lo ni tawh a. Aizawl Municipal Corporation (AMC) chuan kum 2024 khan Aizawl khua leh tuia upa ber nihna chawimawina a lo hlan tawh bawk.
Tunah hian a makpa, H.V. Lalringa, IAS (Rtd.) te in, Khatla-ah a cheng mek a. Ebenezer Corps, Venghnuaiah a lawi a ni.