Aizawl: Saitual district-a MNF VC tling tharte leh term sarih VC tling tawhte chawimawina hun Zawlbuk, Keifang Venghlun-ah nimin khan neih a ni a. MNF Senior Vice President Dr R Lalthangliana’n khuallian niin a hmanpui.
Dr R Lalthangliana chuan thu sawiin, “Harh thar lehna MNF party-ah a thleng mek a, LC leh VC ruling-in zaa sawmsarih vel an la thin ang kha a thleng lo a. ZPM hi an sorkar chak ber lai pawhin MNF-in kan la tam hle a, a lawmawm hle a ni. Tun LC leh VC inthlana ruling hniam taka an awm hi a la thleng ngai lo a ni,” a ti a. MNF LC leh VC-te chu danglam bik, tha bik, entawntlak ni turin a chah bawk.
Dr Thangtea chuan, “MNF leh Congress kan lo sorkar tawh a, mipuiin hetiang reng renga sorkar an nin hma hi a la awm ngai lo. Thil tam tak an tiam a, driver pension scheme thlengin an tiam a. Engkim mai an tiam a, an sorkar hma atangin mumang ramin an kal a. ‘Thlai thar kan lei ang, motor pakhat chauh kan kawl ang,’ an ti a, an thusawiin na takin a vaw let mek a ni. An kal dan en hian ZPM hian an daih rei ka ring lo,” a ti.
Dr Thangtea chuan, “MNF chu sorkar leh turin a inbuatsaih leh mek a. Policy & Programme Committee din a ni a, a ki dang deuhin ram mipui zawh tur leh thalaite dinchan theihna tur hawi zawng, thingtlang lo neitute dinchhuahna tur kan duang dawn. A ki danglamin policy tihhlawhtlin ngei tur kan duang dawn a ni,” a ti.
MNF senior vice president chuan, “Ramri buai, vawk pul hri leng, lirnghing, kangmei leh Covid hripui kan tawng a. Khati khawpa buaina nasa kan tawk chung khan district thar pathum kan puante tha takin kan function-tir thei a. Hei bakah hian hmasawnna kawng hrang hrangin nasa takin kan kalpui thei a ni,” tiin, MNF hma lam a êng hle a, an sorkar leh ngei ang tih a rin thu a sawi bawk.
Tawi East Block MNF President H Lalremtluanga kaihhruai inkhawmah hian MNF adviser leh Aizawl mayor ni bawk, Lalrinenga Sailo pawhin thu a sawi a. He hunah hian Saitual district atanga MNF VC tling thar 74 hnenah chawimawina hlan an ni.