Iraq laili leh chhim lam hmun zau tak chu vaivut thli na takin a tuam a, hei vang hian mi sang telin thawk lama harsatna an neih phah niin damdawi in thuneituten an sawi.
Muthanna province-a thuneitu pakhat chuan thaw tha thei lo mi 700 vel an awm tih AFP news agency hnenah a sawi.
Online-a thlalak leh video thehdarhah chuan khawlai chu vaivut avangin serthlum rawng angin a lang phut a, tual chhung chanchinbute chuan hmun tam takah power tihtawp niin thlawhna chhuak leh lut tur tam tak thulhtir an ni tih an tar lang.
Iraq-ah hian vaivut thli thawk hi a thleng fo va; mahse, mi thiamte chuan sik leh sa inthlak nasa avangin tunah hi chuan a nasa zual ta niin an sawi.
Kea kal leh police-te chu vaivut laka an him nan an hmai tuam tura tih an ni a, damdawi thiamten thawk harsaa buaite chu an buaipui nasa hle bawk tih AFP chuan a tar lang.
Chhim lama Muthanna province-a damdawi inte chuan ‘thaw tha thei lo mi 700 vel’ an dawn thu leh an enkawl thu thuneituten an sawi.
Najaf province-ah pawh damdawi inah mi 250 chuang dah luh an ni a, naupang eng emaw zat telin mi 322 chu Diwaniyah province-a damdawi in hrang hrangah dah luh an ni bawk.
Dhi Qar leh Basra province-ah te pawh mi 530-in thawk harsatna an neih avangin damdawi in panpui an ni.
Vaivut thli thaw hian Iraq-a chhim lam province tam tam chu serthlum rawngin a tuam vek a, khaw hmuh theih chin pawh km khat pawh a tling lo.
Najaf leh Basra province-ah chuan thuneituten thlawhna tumhmun kharna thupek an chhuah.
Thawhtannia vaivut thli a thawh chiam hnuah hian Thawhlehni atang kha chuan a ziaawm hret niin tual chhunga khawchin zirtute chuan an sawi.
Iraq hi UN chuan sik leh sa inthlakin a nghawng nasat tur ram panga zinga a telh niin vaivut thli, khaw lum uchuak tak leh tui vângin a tibuai nasa thei dawn niin an sawi.
Kum 2022-a vaivut thlipui thawkah khan mi pakhat thiin mi 5,000 chuang enkawl ngaiin an lo awm tawh a ni.
Iraq hian vaivut thli tleh ni hi an la tawng dawn chauh niin an ram environment ministry chuan a sawi lawk bawk.