Aizawl: All Mizoram Village Council Association 2025-2030 hruaitu thlanna chu nimin khan Vanapa Hall, Aizawlah neih a ni. Elected OB post awm zawng zawngah ZPM Party atangin village council member-te thlan tlin an ni.
AMVCA 2025-2030 hruaitu thlan tharte chu President : FP Laikhama, VCP, Sihphir Venghlun; Sr. Vice President : H.Lalfakzuala VCP, Kawnpui VC-III; Treasurer : C.Lalromawia, VCP Tualpui te an ni.
ZPM thuchhuah chuan, AMVCA hruaitu term hi kum nga a ni a, VC member-te hi ram hmasawnna hnathawh kawngah sorkar kut ke pawimawh tak an nih avangin association hruaitu tha neih hi a tul hle tih chu an ngaihdan a nih thu leh, kawng hrang hranga sorkar hmalakna thawhpui thei tur association hruaitu an nei ta chu thlamuanthlak an tiin, khaw tin leh veng tinah hmasawnna thar duhawm tak tak hmuh ngei an beisei tih an sawi.
AMVCA hruaitu thlan hi President tanglai K. Lalngaizuala (VCM), East Lungdar in a kaihruai a; VC member mi 220 kalkhawmin, Returning Officer (RO) R. Lalhmingmawia, General Secretary, AMVCA kaihruaina hnuaiah inthlanna hi tluang taka neih a ni a, hruaitu hlui leh tharte hian charge an inhlan nghal bawk.