Aizawl: Phuldungsei Jampui Hill khuaa Thaidawr leh a chhehvel hmun enkawl leh tuaihnum kawngah Mizoram a muthlu rei chu pawi a tih thu Forest Minister Lalthansanga’n a sawi.
Tun hnaia Mizoram chhunga Tripura sorkarin kut a thlakna, Phuldungsei Jampui Hills khuaa Thaidawr tlang chu nimin khan Forest Minister Lalthansanga’n a tlawh a. Jampui Mizo Convention hruaitute leh Phuldungsei khawtlang hruaituten an lo dawngsawng.
Forest Minister Lalthansanga chuan Thaidawr tlangah hian Tripura sorkarin hma an lo la a ni tih an hriatin, a hmun ngeia enfiah tul an tih thu a sawiin, “He lai hmun hi tuan leh mang ata Mizo lalte luah ram leh thuthmun a ni a. Chutih rualin helai hmun enkawl leh tuaihnum kawngah kan lo muthlu rei hle a ni tih Mizo Convention hruaitute nen kan inkawmna atangin a lang reng mai a, hei hi a pawi takzet a ni,” a ti.
Kalphungthar mipui sorkar hnuaiah he lai hmun hi ngaihsak chhoh zel an tum tih sawiin Lalthansanga chuan, “Kan chief minister kum 40 zet he ram tana lo bei tawhtu hian Mizoram ramri hi a vei a, Boundary Commission tha tak din niin, Assam nena kan ramri buaina chungchang pawh he Boundary commission hian a bawhzui mek a. Hetianga Tripura sorkarin kan ram chhunga kut a rawn thlak hi a ngaihthah mai a rinawm loh. Chuvangin, helai chhehvela cheng mipuite pawhin lungrual taka sorkar hmalakna thlawpa in thawhpui zel ka beisei,” tiin, politics inchirtheh nan leh inlungrualna tichhetu tan hmang lo turin a chah.