Aizawl: LESDE Minister Lalnghinglova Hmar chuan nimin khan MINECO-a a pisaah India leh Japan sorkar thawhdunna hnuaia Japan-a caregiver hna thawka kal turte a thlah.
India leh Japan sorkarin Specified Skilled Worker (SSW) programme kalpui turin Memorandums of Cooperation (MoC) an lo ziak tawh a. Hemi hnuaiah hian Kobe International University, Japan leh Mission Foundation Movement te chuan Japanese Language course kalpuiin he program-ah hian Japanese Language N4 thleng a zir theih a. Zir chhuakte chu Certificate of Eligibility, Ministry of Justice, Japan sorkarin a pek hnuah working visa pek niin nimin khan Japan an pan. Hnathawk tura kalte hi Auxiliary Nurse Midwife course zirchhuak pahnih leh phamacist pakhatte an ni.
LESDE minister chuan, “Japan-in an ramah caregiver hna thawk tur an mamawh a, chumi tur chuan India ram an rawn hawi. An rama thawk turin hmel leh pianhmangah pawh anmahni hnaih deuh zawk tan beisei a sang zawk a, hemi atan hian hma kan la zel dawn. Mizoram nena thawkho turin an inhawng tih an sawi bawk,” a ti.
“India hmarchhaka kan unau state dangte zingah hemi kawng hi hman tangkai tum an awm a, keini pawhin remchang hi kan lak a, kan thawn chhuah loh chuan thenawm state-ten an thawn chhuak zel dawn a ni,” tiin thahnemngaih a tul thu a sawi bawk.
Tun tum hi Mission Foundation Movement leh Japan sawrkar thawhdunna hnuaia Japan-a kal tur batch hnihna an ni a. Anni hma hian caregiver hna nursing course pass chhuak mi 24 chu Japan-ah hnathawk a tirh an ni tawh.