Chief secretary charge la mektu, H Lalengmawia chuan Mizoram sorkara Centrally Sponsored Scheme (CSS) hnuaia dan lova lakte chu dah ngheh theih an nih loh thu a sawi a, lungawi lohna an lantir zel a nih chuan hreh tak chunga inbân pawh thleng thei a nih thu a sawi.
CSS hnuaia hnathawkte chuan dah ngheh ngiatin nimin atanga tanin ni thum chhung sorkar laka lungawi lohna pen/tool down strike an nei tan.
Thawhlehni khan H Lalengmawia chuan Chief Secretary Conference Room, MINECO-ah thu thar thehdarhtute a kawm a. CSS hnuaia thawkte chu dik leh mumal taka lak an awm lo tih sawiin, “Advertisement awm lova DPC kaltlanga lak an nih loh avang leh induhsakna avanga hna inpek a tam hle. Heng ang chiho tan hian CSS Regularisation scheme hi hman theih a ni lo,” a ti.
Mumal lo taka lak an nih avangin seniority list pawh an nei hleithei lo tih sawiin H Lalengmawia chuan, “NHM leh SSA thawktu zingah an tam zual a. CSS Regularisation Scheme kalpui tura thil tul leh pawimawh tak, inter-seniority tihfel a harsa dawn,” tiin, sorkar hna lak chungchangah India danpui hnuaia Article 14 leh 16 an bawhchhiat thian loh thu leh he scheme hi dan anga lakte chauhin an hman theih dawn thu a sawi.
H. Lalengmawia chuan CSS hnuaia dan loa lakte dah ngheh an nih chuan an tlukpuiten court-ah sorkar a khin chuan sorkarin thiam a chang dawn lo tih a sawi a. Mi tin angkhat veka en a ngai tih sawiin, “AMECC thil phut tihlawhtling tur chuan Mizoram sorkarin India danpui a bawhchhiat a ngai dawn,” a ti.
Lungawi lohna an lantir chungchangah AMCECC hruaitute nen pawh inbiakna an nei tih sawiin H. Lalengmawia chuan, “Nuar lo tur hian kan ngen nawn leh a. Tunah hian sorkarin hreh tak chungin ‘no work no pay’ a kalpui mek a. Hetianga lungawi lohna an lantir zel a nih chuan hreh tak chungin sorkar chuan a tih tur tiin, inbân pawh thleng thei a ni,” a ti.
H Lalengmawia chuan state sorkar chuan CSS hnuaia hnathawkte ngheh dan turah hian sorkar pawhin office memorundum a tichhuak tawh tih sawiin, “State sorkar recruitment rules hnuaiah an ngheh theihna tur hian office memorundum pawh an tichhuak vek tawh a ni,” a ti bawk.
Hetih lai hian AMCECC chuan, “Pen/Tool Down Strike kan neih hnuah hian Mizoram sorkar chuan inbiakna mumal engmah min la neihpui lo va. Chutihmek lai chuan chief secretary charge la mektu chuan press conference-ah CSS hnuaia dan loa lakte chu dahngheh theih an nih loh thu a sawi leh, AMCECC thil phut an tihhlawhtlin chuan India Constitution bawhchhiat a ngaih dawn thu a sawi hi hriatthiam har kan ti,” an ti ve thung.
“CSS-te dinhmun hrechiangtu kan sorkar chuan CSS-te dahngheh theihna tur dan ‘Govt, of Mizoram Regularization of CSS Employees Scheme, 2024’ chu duhsak takin min siamsak a, he dan hi a taka kan hman ngei theih nan kan chief minister zahawm tak pawhin a theihna dan zawng hram hram tura thuneitute a chah laiin, min dah ngheh theih nan hma la lova a harsatna leh a theih lohna dan min zawnsak zeltu an la awm fo hi kan duh lo. Mizoram sorkar hian a duh chuan CSS hnuaia thawkte a lo dah ngheh fo tawh thin a, keini aia mumal lova lakte pawh dah ngheh an lo ni tawh thin a ni,” an ti bawk.
AMCECC chuan an member dan lova lak an awm an hriat loh thu leh sorkar appointment order mumal tak nei veka lak an nih thu an sawi a. Dan dik loa lak an awm a nih chuan dan loa latu chu sorkarin chhui chhuakin a mawhphurtute chungah na taka hmala turin an phut thu an sawi bawk.