Aizawl: Mizoram Aam Aadmi Party (AAP) chuan Aizawl Peak Resort, Zuangtui-a skywalk/skybridge chu phalna nei lova sak a nih thu an sawi.
Inrinnia thuchhuah an siamah Mizoram AAP chuan, Skywalk/Skybridge, Aizawl Peak Resort, Zuangtui a mi, kumin February 18-a Chief Minister Lalduhoma’n a hawn chu, RTI-a chhanna an hmuh danin phalna neilo a sak a nih thu an sawiin, “Aizawl municipal area-a AMC hriatpuina tello a sak a ni hi mak kan ti hle a, he skywalk neitu pawh hi ZPM MLA ni a sawi awm hi hriatchian kan chak hle a ni,” an ti.
Mizoram AAP chuan, he Skywalk/Skybridge hi a thain, Mizoram tan leh Mizote tan inchhuanna tham a tling mah se, AMC huam chhunga mi, AMC hriatpuina leh endikna tel loa an siam hi a him tawk lo ang tih an hlauh thu an sawi a. Social media a an hmuh anga, balu bag 600 dahchhin hmanga a him tawk leh tawk loh enfiah a ni hi a tak a nih ngai chuan modern technology tha ber hman a ni lo tihna a ni a, chhiatrupna thleng thei reng ni-ah ngaih loh harsa an tih thu an sawi.
He skywalk hi Mizoram tan pawh a tangkai tak la ni zel tur hi engvangin nge AMC hriattir lo leh phalna nei loa siam a ni tihte leh AMC lamin engvanga an hriatpui loh a siam/sak hi hma an lak loh leh hemi phenah hian sorkara thuneitu liante an inrawlh em tihte chu an zawhna a nih thu an sawi bawk.