Aizawl: MNF Thalai chuan Adviser to chief minister (Handholding) Dr KC Lalmalsawmzauva’n tun hnaiah hmunphiah chungchangah dawt a sawi ngei tih an finfiah thu sawiin, mipuiah ngaihdam dil an phut.
Nimina an thuchhuahah MNYF chuan, Mizoram hmun hrang hranga hmunphiah chingtuten a hralhna hre lova lungngaia an tah laia, tun hnaiah Adviser to CM (Handholding) Dr KC Lalmalsawmzauva’n ‘Mizorama hmunphiahte sorkarin a lei zo vek tawh’ tia dawt chiang tak sawi a, mipui a bum chu an dem tih sawiin, mipuiah ngaihdam a dil ngei an phut thu an sawi.
MNYF-in an tar lan danin, MNYF Hqrs leh MNYF Block hruaitute’n nimin khan Mizoram hmun hrang hrang – Hachhek bial, West Tuipui bial, Mamit bial, Dampa bial leh Thorang bialahte sorkarin a intiam angin hmunphiah a lei miah lo tih an hmuchhuak tih an sawi a. N. Hlimen, Saipum, Saiphai leh Vairengte-ahte pawh hmunphiah chingtu a hmun ngeia kal chilhin an kawmnaah pawh hmunphiah hi sorkarin lei loh thu leh hnam dang sumdawngten an duh duh danin rate siama hmunphiah hring leh ro an lei chu a pawi an tih thu an sawi bawk.