Kar liamta a ropui taka Rio De Janeiro khawpuia concert nei Lady Gaga hun hman lai khan bomb hmanga beih tum a ni a, beih tumtute hi pathum niin, Brazil thuneitute chuan an man tawh thu leh thubuai an siamsak thu an sawi.
Heng an mi mante hi an hming tarlan a ni lo a, thuneitute sawi dan chuan LGBTQ+ thlawptute chu an beih tum ber a nih thu leh Rio de Janeiro concert chu ruahmanna fel tak nena beih an tum thu leh firfiak thubuai an siamsak thu an sawi bawk.
Hmeichhe artist zinga concert chhimtu ngah ber concert-na hi an programme tan hma darkar engemawzatah beih tum a nih thu report an dawn thu police te chuan sawiin, beih tumtute hi khawtlang nunhona kawnga record duhawm lo neite an nih thu an sawi a ni.
Hetih lai hian Gaga’s team lam chu reporter te hmaah beih tum a nih thu hi engmah an hriat loh thu leh inbuatsaihna pawh engmah an neih loh thu an sawi thung a, a hnu lama an hriat leh erawh chuan an hlauthawng thar hle tih an sawi.
Thuneitute sawi dan chuan beih tumtute hian Gaga chu setanist dik tak nia an hriat thu leh boruak lian tak vawrh a tum chu an ngai thei lo hle niin an sawi a, bomb hmanga tihbuai an tum ta niin an report bawk.
Hetih lai hian Bloody Mary singer hian vantlang hmaah setana sakhua a ngaihven thu a sawi ngai lo a, Kristian sakhua a rin thu a sawi chhuak nasa hle thung. Tun hnaia Setanist nena inzawmna nei anga an sawina tam zawk pawh a hriat ve thu leh an ngaihdan a dik loh thu erawh a sawi nasa hle.