Indian awp Kashmir-a helho chetna lian tak a thlen atanga chawlhkar hnihah India chuan Pakistan leh Pakistan awp Kashmir a kap ta.
Indian defence ministry chuan ‘Operation Sindoor’ tia a vuah beihpui a thlak hi April 22-a Indian 25 leh Nepali pakhat thah tak a chhan letna a nih thu a puang.
He beihna thlenga inhnamhnawihna neia puhna phatu, Pakistan chuan an ram beih a ni chu ‘tih tur tul lo’ a nih thu a sawi a, Prime Minister Shehbaz Sharif-a chuan ‘rawng taka min nawrna hi chhan let lohvin a awm lo vang’ tiin a sawi.
Delhi chuan Nilaini khaw var hma khan Pakistan awp Kashmir leh Pakistan-a hmun kua an kah thu a puang.
Heng hmunte hi ‘firfiakte hmun’ tia sawiin beihna an tawh ‘ruahmanna leh thu pek chhuahna hmun’ niin a sawi.
Pakistani sipaite hmun engmah an kah loh thu an sawi a, ‘tum bik, ruahmanna fel leh khawvel dana inepna siam lo zawngin’ a chet thu a sawi bawk.
Pakistan chuan hmun thum kah a nih thu a puang a. Pakistan awp Kashmir-a Muzaffarabad leh Kotli Pakistan-a Punjab province-a Bahawalpur a nih thu a sawi.
Pakistani Defence Minister Khawaja Asif chuan GeoTV hnenah civil mite awmna pawh kah a nih thu a sawi a, India-in ‘firfiak camp’ a tum tih a sawi chu a dik lo tih a sawi.
Pakistani sipai thupuangtu, Ahmed Sharif-a chuan mi pasarih an thih thu leh an zingah naupang pahnih an tel thu BBC hnenah a sawi bawk.
Khualzin tlawh nasat hmun, Pahalgam-a mi firfiakte an chet hnua nuclear nei inthenawm ram pahnih hi nasa taka an inep hnuah inkahna hi a thleng ta a ni.
April 22-a beihna thlengah khan helhovin mi 26 an that a, dam chhuakte chuan thah tur hian Hindu mipa an thlak chhuak niin an sawi nghe nghe.
He thil hi kum 20 chhunga heng lai biala civil mi thah hnem ber tum niin India ram pumah thinrimna leh duh lohna thawm a ring hle.
Prime Minister Narendra Modi chuan a titute chu ‘khawvel tawp thleng pawhin’ an umzui dawn thu a sawi a, a ruahman leh a hlenchhuaktute chuan ‘an rinphak baka na hremna an hmu dawn’ tih a sawi bawk.
India chuan eng pawhin Pahalgam-a beihna kha thlen tih a sawi lo va, tun thlengin tute tih nge tih chiang taka hriat a la ni lo.
Indian police erawh chuan an zinga pahnih chu Pakistani an ni tih an sawi a, Delhi chuan Pakistan-inheng mite hi a pui niin a puh a, Islamabad chuan a pha nasa hle a. April 22-a thil thlengah khan engmah inrawlhna an nei lo tih an sawi.
Beihna thlen atangin chawlhkar hnih a liam a, ram pahnihte hi nasa taka inep zuiin an palaite an inhnawh chhuahsak a, visa intihtawpsak tawnin ramri kânna an khar bawk.
Mi tam tak chuan lum 2019-a Pulwama-a Indian paramilitary force 40 thah an nih tum ang khan ram pelin India hi a chet an ring sa a ni.
Kashmir hi kum 1947-a Britain laka India leh Pakistan te an indan rual khan an ram niin an chhal ve ve a. Inchuhin vawi hnih an indo tawh.
Tun hnaia helho chetna avangin an inkar a khi nasa leh zual a. Indian awp Kashmir-ah hian kum 1989 atang khan helna a tam hle a, hengho hian venhim hna thawktu leh civil mi an bitum nasa.
Pahalgam-a thil thleng kha kum 2019-a India-in Article 370 behchhana Kashmir inhung bikna a hlih hnua beihna lian ber a ni.
Kum 2016 khan Indian sipai 19 chu Uri-ah thah an ni a, India chuan ram pahnih inrina, Line of Control (de facto border) pelin helho awmna beiin, ‘surgical strike’ a thlak.
Kum 2019 khan Pulwama beihna avangin thlawhna hmangin Balakot a bei leh a, hemi tum hi Pakistan pawhin chhang van sangah an inum nasa a, kum 1971 hnua hetiang a thlen leh hmasak ber a ni.
India a chet chhuah takah hian eng nge thleng zel dawn hriat a ni lo va, ram leh palai hrang hrangte chuan boruak tidai turin hma an la.
UN chief Antonio Guterres pawhin ‘inbengdai’ turin a ngen a, US President Donald Trump pawhin inbeihna chu ‘a tawp thuai’ a beisei thu a sawi bawk.