Aizawl: Mizoram Universal Health Care Scheme (MUHCS) chungchangah MNF Sr Vice President Dr R Lalthangliana chu mipuite hnena thudik chanve sawiah ZPM Thalai chuan an puh.
Nimina an thuchhuahah ZPM Thalai hian, Thawhtannia MNF pisa Mizo Hnam Run-a inkhawmah Health Minister hlui Dr H Lalthangliana’n ‘Asian Development Bank (ADB) atanga loan puk phalna MNF sorkarin a tifel tawh’ tia a sawi chu thudik chanve a nih thu an sawi a. Hetih rual hian, MNF an sorkar laia theihtawp chhuaha hma an lo lak tawhna erawh tha an tihpui rualin, thudik famkim sawi thin turin an chah.
ZPM Thalai chuan ADB atanga loan lak tumna hi MNF sorkar lai, May 31, 2022 khan 128th Screening Committee of Department of Economics Affairs (DEA) chuan ngaihtuahin, NITI Ayog leh Ministry of Health & Family Welfare ngaihdan a lak hnuah, June 14, 2022-ah Screening Committee chuan approval a pe a, he approval hi loan lakna tura approval a nih loh thu an sawi.
ZPM Thalai chuan Screening Committee approval hmuh a nih hnuah Fact Finding Mission neiin, ADB hotute Mizoramah lo kalin Fact Finding Mission an ti a, loan approval pek hmain Independent Verification Agency (IVA) chu tifel hmasa turin Mizoram sorkar an hriattir a. Loan lakna tura MNF sorkar laia proposal siamsa kha Grant Fund tura tih ni mah se, Universal Health Coverage atan Grant pek theihna hi Central Govt. Policy-ah a awm loh avangin proposal chu ennawn turin DEA chuan ADB leh Mizoram sorkar chu November 22, 2024 khan a hriattir tih an sawi.
ADB puihnain Mizoram sorkar chuan proposal siam ngai te siam thar lehin a hming atan ‘Supporting Health Care Systyem Strengthening to Achieve Universal Health Coverage for Mizoram’ tia thlak niin, proposal thar DEA hnenah a thawn leh a. Hemi hnuah thil pawimawh zawng zawngtihfel hnu hian Loan Negotiation leh Loan Signing chu a awm thei dawn chauh a, Health Minister Lalrinpuii hmalakna kal zelah MUHSC chu harsatna awm lova kalpui zel a ni a, MUHC Funding-na tur ADB a loan dil chungchangah MNF sorkar tihfel sa, ZPM sorkar chuan rin tur a hmu lo va, theihtawp chhuaha hma tharte lain loan process dan kalphung pangngai in tunah hian hmalak mek niin a hlawhtlin ngei pawh an beisei tih ZPM Thalai chuan an sawi bawk.