Aizawl: Union Minister of State for MSME & Labour & Employment Shobha Karandlaje chuan nimin khan Khawzawl district a tlawh a, Khawzawla sorkar pisa hotute a kawm.
Khawzawl DC Auditorium-a an inkawmnaah union minister chuan sorkar department hrang hrang hotute zawhna leh a hriat duh zawng a zawt a, scheme chi hrang hrang – PMEGP, PM Vishwakarma, MGNREGA, PM KISAN, Jal Jeevan Mission leh department kaihhnawih hrang hrang chungchang a sawipui a. District hotute chu district tana theihtawp chhuah tur leh hna tul ngai pawimawha, eirukna leh hlemhletna laka fihlim tlat turin a chah.
An inkawmnaah hian Khawzawl DC K. Vanlalthiana’n thu a sawi bakah SDO (Sadar) Suvigya S. Chandra chuan an district-a department hmalakna leh scheme hrang hranga an hmalak dante a sawi fiah.
An inkawm zawh hnuah union minister chuan Govt. Little Flower School tlawhin, zirtirtute leh zirlaite a kawm a. PMAY(G) hnuaia sak in a tlawh bawk a. Chawngtlai panin MzSRLM Rurban Centre-te, Passion Fruit Processing Unit te leh Chawngtlai Anganwadi te tlawhin Chawngtlai mipuite a kawm zawhah Khawzawla Mualvawm Helipad atangin helicopter-in Aizawl a pan.