Iranian Foreign Minister Seyed Abbas Araghchi-a chuan Nilaini zan khan New Delhi thlengin India a tlawh tan a. Ningani khan S Jaishankar nen inkawmin India leh Iran inkara 20th Joint Commission thutkhawm an kaihruai dun bawk.
Kumin thutkhawm hi New Delhi leh Tehran ten India-Iran Friendship Treaty an ziah kum 75-na lawmna a ni nghal a. Thutkhawmah hian inremna thil hrang hrang kalpui sa bakah huang thara thawhho dan tur leh nghet zawka an inthun zawm dan tur te pawh an sawi ho.
Joint Commission hi kum tina thukhawm tura ngaih ni mah se COVID-19 hripui leh ram pahnih ram chhunga thil thleng hrang hrang avangin thulh a ni tawh thin.
“Ram pahnihten economy lama inkungkaihna an lo siam tawhte chu thlir nawnin commission-in hna a thawh zara huang zauh zel dan tur sawiho a ni dawn a ni,” tiin New Delhi-a Iranian Embassy chuan a hmain X-ah a tar lang.
Iranian foreign minister hian President Droupadi Murmu chu Rashtrapati Bhavan-ah a kawm bawk ang.
Araghchi-a’n India a tlawh hi Pakistan nena inkungkaihna nei nia Delhi-in a puh mi firfiakten Jammu & Kashmir-a Pahalgam-a mi 26 an thah avanga India leh Pakistan inkar a chhiat vanglai tak a ni a. India hian phuba lak nan Pakistan leh Pakistan awp Kashmir-a mi firfiak hmunte chu missile-in a kap tawh nghe nghe.
Iran pawhin a hmain sakhaw tihbingna thil avanga Kashmir-a mi firfiakte chetna a dem thu a lo sawi tawh a. Foreign minister pawhin a mi malin Pahalgam-a khualzinte thahna a dem thu leh a tuartute a tawrhpui thu a sawi a ni.
Iran hian India leh Pakistan inkara sipai hmanga inepna pawh ngaimawhin inbengdai turin a lo ngen ve ve tawh a. Foreign Ministry thupuangtu, Esmail Baghaei chuan Tehran hi New Delhi leh Islamabad te nen hun rei tak atanga lo inpawh tawh niin tuna an dinhmun mek chu a ngaihvenin tha a ti lo hle tih a sawi.
Ram pahnih hian an boruak tang tak chu titawp tura hma an lak ve ve a beisei thu a sawi bawk.
Kar tir lamah khan Araghchi-a hian Pakistan a lo tlawh tawh bawk a, politics hruaituten zuiin Pakistani Foreign Minister Ishaq Dar nen pawh an inkawm.