Aizawl: Lengteng bialtu MLA F Rodingliana’n a bial chhunga mi harsa zawkten Mizoram Universal Health Care Scheme (MUHCS)-a an inziah luh nan, a thla khat hlawh bakah MLA fund atangin Rs nuai 10 a pek tur thu a sawi.
He thu hi Minister of State, F Rodingliana’n nimina a bial, Lengteng huam chhunga HSLC zirlai tithate chawimawina leh lawmpuina hun Ngopa Community Hall-a a hmanpuinaah a sawi.
F Rodingliana chuan MUHCS chu ram mipui tan scheme tha anih thu sawiin, a bial chhunga chhungkaw tinte lo inziaklut vek turin a chah a. Healthcare Scheme chungchangah harsatna thenkhat tihfel ngai la awmte sorkarin a tihfel mek zel thu sawiin, VC-te chu mahni khua theuhah lo puanzar vek turin a chah a, sorkarin ruang phurh policy hlawhtling taka a lo kalpui tawh angin MUHCS chu mipui harsatna sukkianna tur policy tha a nih thu a sawi bawk.
Minister F Rodingliana chuan a bial chhunga HSLC-a distinction leh first division-a pass te lawmpuina thuziak bakah pawisa fai a hlan a ni.