Aizawl: Mizoram Health Systems Strengthening Project (MHSSP) buatsaihin nimin khan World Bank aiawhte leh Health & Family Welfare Department hotuten damdawi in inrelbawl dan leh damlo enkawlna tha zawk neih chhunzawmna tur leh thawktu indaih lohna avanga harsatna sutkian dan tur an sawi ho.
Directorate of Hospital & Medical Education, Auditorium, MINECO-ah thutkhawmah hian Dr. Lily Chhakchhuak, Project Director MHSSP /Mission Director NHM chuan MHSSP kaltlanga hmalakna hnuaiah damdawi inte thuam changkan a nih thu leh, damdawi in 18 laiin National Quality Assurance Standard (NQAS) certification an hmuh tawh thu a sawi a. Mizoram Universal Health Coverage hman a ni thei te hi lawmawm a tih thu sawiin, heng zawng zawng hi mipui tan vek a ni tih hriaa theihtawpa tan la zel turin a chah.
World Bank Consultant Dr. Lincoln Chowdhury chuan, Mizoramin damlo enkawlna quality tha zawk pek kawnga hmasawnna leh hmarchhakah pawh a ti tha ber an nih thu sawiin, state dang tan pawha entawntlak a nih thu a sawi a. Mizoram tan hmasawn zawnga kal zel theihna tura hmanrua tha tak tak hmun danga an lo kalpui tawhte a sawi bawk.
He hunah hian Mizorama health department hnuaia thawktute chungchang MHSSP-in zirchianna a neih dan Dr. Lalnuntluangi, Deputy Project Director, MHSSP chuan sawiin, dealth dept hnuaia hnathawktute zingah regular aia contractual staff an tam zawk thute leh state health budget atanga zaa 68 lai thawktute hlawh atana hman ral thin anih thute a sawi a. Health department hnuaia thawktute thuam chak kawngah policy mumal tak duante, medical lam zirna in neih belh a tul thu te, thawktu lak reng reng training mumal tak pek hmasak an tul thu te leh training-na tur hmun bik bakah hmanraw thate mamawh a nih thu a sawi bawk.