A boral atangin kum 44 a vei ta, nimin ang lek erawh a ni si; a chanchin ngaihnawm chu –
- Bob-a pian lai hian a pa hi kum 50 mi British lawng captain Norva Sinclair Marley a ni a, a nu Cedella erawh mihang niin kum 19-a upa a ni thung. Feb 6, 1945 khan Jamaica ram khawte tak te- Nine Mile-ah zing dar 2:30 khan a piang a. Hemi tum hian Cedella pa hi a lawm hle a, mingo lawng captain nena an lo chesual kher chu vanneih thlak a tiletling zawk a, chutih laiin, a pate lam erawh thinrim hle thung.
- A naupan lai hian kutze en a thiam hle a, thil thleng tur tam tak a hrilh lawk nual a, a dik vek bawk. Jamaica khawpui Kingston-ah pawh a eizawnna hi a hlawk hle a, a hnu-ah an khuaah haw lehin, kutze en a bansan a. Zaithiam nih a tum nghal tawp mai a, a thih ni thleng khan kutzia en tura an ngenna reng reng a hnawl fai vek.
- Music style (genre) “Reggae” awmzia dik tak hi tuma’n an hre lova, a lo chhuahna bul chhui theih a ni lo bawk. Ngaihdan a hrang.
- Naupang kum 7 mi lek a nih lai atanga hna rum tak tak thawk thin anih avangin a in ‘fit’ hle a, hetih lai hian mel 5-a hlaah thing a fawm thin a, hnathawh hi a tan thil harsa a ni lo. A lar hnu-a a band member te nena hla an zir te hian darkar tam tak a awh thin a, a hahthlak em em a, mi pangngai tan chuan chhuata tluk tawpna tham a tling.
- Kum 21 anih hian sunday school zirtirtu hmeltha tak Rita (a thih ni thlengin an innei) chu a nei a, chutih laiin a fa nia sawi leh a nupui nia sawite pawh tam tak an inlar zut zut reng a, a lo berah fa 20 vel a neih an ring.
- July 1973 khan Bruce Springsteen-a concert khuhhawnnaah a thiante nen an zai a, hemi kum vek hian Sly & the Family Stone ho a zui leh a, show vaw li an neih zawh chuan a chetthat leh thiam em avangin tour-a a tel zel an phal sak lova, an haw tir daih a ni awm e.
- A lar hnu pawha a la rethei reng mai chu amah pawhin mak a ti hle a, a han chhui chian chuan a manager leh thiantha tak ni bawk, Don Taylora’n a lo eiruk sak char char tih a hmu chhuak a, a ban nghal.
- Football khelh a thiam hle a, table tennis-ah pawh sawi hat hat a tling.
- Rimawi khawvela hriat a hlawh em em laiin May 11, 1981 khan cancer avangin a boral a, hetih lai hian kum 36 leka upa a ni. A ruang an zalhna hmun Jamaica’s National Arena-ah hian a kuang hi mi 40,000 chuangin zah takin an en a, a chhungah pawh hetiang zat vel tho hi an pungkhawm bawk.
- A hla a chuai leh ngai tawh lo tur, “No Woman, No Cry” chu tun thleng hian sak lar a ni a, khawvel hmun hrang hrangah naute awih-mut nan tangkai takin an hmang mek.