Aizawl: Synod Prison Ministry buatsaihin Inrinni khan Tuikual Presbyterian Kohhran Hall-ah jail tang tawhte pual hun hman niin, Excise & Narcotics Minister Lalnghinglova Hmar-in a hmanpui.
Ex-Prison Inmates follow up programme vawi 5-na hi hun hniha hman a ni a, hun khatna hi Rev. Lalhleia, Director, Synod Prison Ministry-in a kaihruai a. Minister Lalnghinglova Hmar chuan thu sawiin, mi sual deuhte bula thusawi tur anga a inngaih thu leh jail tang tawhte a hmuh hnua mi sual an nih lohzia leh buan hneh loh an neih vanga hetiang dinhmuna ding an nih zawk thu a sawi a. Sam ziaktu pawh nun beidawnna leh lungngaihna a paltlang hnuah Pathianah beiseina a neih thar thu sawiin, ex-prison inmates-te pawh beiseina nghat tlat turin a fuih a, kut themthiamte an nih avangin hma lam pan zel turin a chah bawk.
Jaila tang tawh, Lalramnghinglova, Khawngaihna In dintu pawhin thu sawiin thla kaw chhung jail-a a tan thu leh jail-a a luhpui loh Lal Isua Krista nen jail atanga an chhuah thu sawi.
Hun hnihnaah Pastor Malsawmtluanga, SPM Committee member leh jail tang tawhte atangin mi pasarihin thu an sawi.
He hunah hian mi 128 an tel a, heng zinga mi 51 hi jail tang tawhte an ni. Kum 2023 atang khan Synod Prison Ministry buatsaihin ex-prison inmates follow up programme hi kum tin vawi hnih hman thin a ni.