Aizawl: Ramthar Veng Branch YMA Education Sub-Committee chuan an veng chhung zirlai naupangten an zirlai mek te, zirna sang an hmachhawnna tur te, hna zawnna lama hma an sawn theih nan leh hmangchang an hriat theih nan Ramthar Veng Aptitude Challenge Examination (RACE) 2025 chu nimin khan an buatsaih.
St.Lawrence School, Ramthar Venga exam buatsaihah veng chhung zirlai te hi category 4-ah thenin, Category 1 – Class 1 to 5, Category 2 – Class 6 to 8, Category 3 – Class 9 to 10, Category 4 – Class 11 to 12.
He exam-ah hian zawhna pawh national level-a siam niin section hrang hrang Quantitative Aptitude, Reasoning, GK leh English-ah te inelin OMR Sheet hmanga exam tir an ni a. Exam-ah hian zirlai 312 an tel thei.
Result hi June 20, 2025 ah puan a ni ang a, lawmman tur leh senso sum zawng zawng hi vengchhung mi thahnemngai ten an thawhkhawm a ni.
Central YMA thuchhuak angin, YMA branch hrang hrangin kumin atang hian Education Sub-Committee an din a. Ramthar Veng Branch pawhin Education Sub-Committee hi dinin, kum tir atangin veng chhung zirlaiten hma an sawn theihna tur leh khawtlanga zirna boruak a len theih nan nasa takin hma a la mek reng a. Hmalakna chi khat atan RACE 2025 hi ruahman niin, veng chhung nu leh pa te bakah school awmte nen tangrualin buatsaih a ni.