Aizawl: MPCC Treasurer Dr Lalmalsawma Nghaka chuan tun hnaia Zuangtui Vengthara Hot Mix Plant chu boruak tichhe nasa thei dan kalha sorkarin a kalpui chu thil dik a nih loh a sawi a; a neitute thlavang hauh ringawt lovin, mipui harsatna tawh mek sutkiansak tura a phut thu a sawi.
Thawhtanni khan Dr Lalmalsawma Nghaka chuan Zuangtui Vengthara Hot Mix Plant halchhiat chu a hmunah kalchilhin a enfiah a. Kawng siamna atana pawimawh tihchhiat a ni chu pawi a tih thu a sawi a. Chutihrual chuan, lirthei tak ngial pawh pollution certificate nei lo mana pawisa chawitir a nih lai a, boruak tichhe nasa thei dan kalha sorkar berin a kalpui tlat chu thil dik a nih loh thu a sawi.
Dr Lalmalsawma Nghaka chuan, PWD Dept-in Mizoram Pollution Control Board (MPCB) atangin Hot Mix Plant dah turin phalna an nei lo nia sawi chungchangah, dan bawhchhiatna a awm em tih sorkarin endik tura a duh thu a sawi a. “Zuangtui mipui tena an nawr chung leh MPCB pawhin tum hnih lai thupek a pe tawh chunga, PWD-in an zawm thei lo leh a hnu lama insawifiah tuma nasa taka chet an la chu a zia lo tak zet,” a ti.
MPCB thawktute chu Adviser to CM pakhatin na takin a vau let tih thawmte a thang leh zel tih sawiin MPCC Treasurer chuan, “He Hot Mix Plan neitu, Ms Sky builder-te thlavang hauh ringawt lovin, mipuite harsatna tawh mek hi sut kiansakpui turin kan phut zawk a ni,” a ti bawk.
Zuangtuia ZPM Local Council hotute pawhin, vawi engemaw zat sorkar leh an bialtu MLA ngei hnenah mipui harsatna an thlen tawh tih hriat ni mah se, vawiin thlengin mipui harsatna tawh mek hi enpui leh ngaihsak a la hlawh lo tih hriat a nih thu a sawi a. A bialtu emaw, Forest and Climate Change portfolio changtu hian a bial mipuite harsatna tawh mek hi chinfel sak tura an phut thu a sawi bawk.
“Development hi a pawimawh a, heng Hot Mix Plant-te pawh kawng siamthat zung zung nana pawimawh hle tih kan hria. Mahse, mipui tana ninawm leh pawi thei lo zawk leh pollution titlem tura hmalakna te awm thei se kan ti hle mai,” MPCC treasurer chuan a ti.