Aizawl: Sorkar laipuia Ministry of Skill Development & Entrepreneurship Secretary Atul Kumar Tiwari leh Labour, Employment, Skill Development and Entrepreneurship (LESDE) Minister Lalnghinglova Hmar ten Mizorama skill leh entrepreneurship hmasawnna tur sawi dunin Inrinni khan an inkawm.
Aizawl Peak Restaurant-a inkawmnaah Lalnghinglova Hmar chuan MSDE Secretary-in Mizoram a tlawh chuan hmasawnna a thlen ngei a beisei thu a sawi a. Sorkar laipuiin ITI tihchangtlunna a kalpui tura sum thahnem tak a dah chu Mizoramin a chhawr theihna tura remchanna siam turin a ngen a, India rama a hmasa ber tura Sports & Skills thui khawm tura Mizoram sorkar rawtna (proposal) thehluh chu pawmsak turin a ngen bawk.
Tiwari chuan Mizoram a thlen hnuah LESDE department tih tak takna leh hmasawn duhna a hmuhin lawmthu a sawi a, ITI-a training neite pawh an hmanraw neihte tha tawk lo mah se thiam duhna tak tak an neia a hriat thu leh, sorkar laipui atanga puih theihna awm angte a ngaihtuah tur thu a sawi.
Sorkar laipuiin kut themthiamnaa hmasawnna tura scheme a neihte leh a kalpui mekte zir chiang turin LESDE Department thawktute Delhi-a kal turin a sawm bawk.
Atul Kumar Tiwari hian zan khat riakin Aizawl a tlawh a, Industrial Training Institute, NIT, National Institute of Electronics & Information Technology (NIELIT) bakah Mizoram Badminton Centre, Zuangtuia grassroots badminton training kalpui mekte a tlawh bawk.