Lunglei West bialtu MLA C Ngunlianchunga chuan Lawngtlai by-pass road siamna tur sum tihchingpena puhnaah sorkarin court-a chhui phalna leh a chungthu ngaihtuah a remtih chungchangah, anticipatory bail lak a tum lo thu a sawi.
Thawhtannia Trained Nurses Association of India, Lawngtlai district branch-in LADC Hall-a International Nurses Day an lawmna hmanpuitu Lawngtlai West bialtu MLA C Ngunlianchunga chuan tun hnaia thubuai a neih chungchang sawiin, “Lawngtlai By Pass Raod laihnaah thil fel lo a awm nia hriat chungchangah, he hna buaipui tan laiin LADC-a CEM ka nih lai a ni. Ka thubuai chu sorkarin court lamah ngaihtuah a remti a. Ka thubuai neih chu eirukna, hlemhletna lam a ni lo,” a ti.
Congress MLA C Ngunlianchunga chuan tlawmngai tura ram neitute a ngennaah a hnu lamah he project lo puitling lo zui nen, thuneihna hmang sualah puh a nih tak thu sawiin, “Assembly house-a ka lo sawi tawh angin eirukna a ni emaw, thuneihna hman sualnaah pawh, inhnamhnawihna ka neih ka hre lo,” tiin, anticipatory bail lak a tum loh thu leh a tul chuan ram tan jail tan a inhuam thu a sawi bawk.
April 30, 2025 khan Mizoram sorkarin Lawngtlai by-pass road chungchang sum tihchingpena puhnaa chungchangah C Ngunlianchunga chhui phalna leh a chungthu ngaihtuah phalna prosecution sanction order a tihchhuak a ni.
March 10, 2025 khan Assembly budget session-ah Chief minister Lalduhoma’n house-a Lalmuanpuia Punte zawhna, LADC CEM tura ruat V. Zirsanga thubuai chungchang a chhannaah C. Ngunlianchunga, MLA pawh thubuai nei lai a nih thu a sawichuakin, chargesheet peih thawkhat a nih tawh thu leh prosecution sanction dil mek a nih avangin, anticipatory bail lo laklawk te pawh a that a rin thu a sawi.
Hetih lai hian, Congress MLA hian thubuai a neih a hriat loh thu a sawi ve thung a, “Ka chungchangah prosecution sanction pek a tul a nih pawhin chief minister-in lo pe rawh se, a tul chuan ka tang mai ang, he thubuai hi sorkar hmasaah CBI-ah pek an tum a, an pe leh ta lo a, CBI te kha lo kal se ka ti a, hlauhthawn tur ka nei lo e,” tiin house chhungah hian a sawi.
Hemi ni vek hian Aizawl Press Club-ah thuthar thehdarhtute kawm nghalin Lawngtlai West bialtu MLA chuan, Chief Minister-in a sawi hnuah thubuai a nei tih a hre chauh niin a sawi a. Thubuai a neihna Lawngtlai by-pass road, Thingkah atanga kawng siamna tur sum tihchingpen chungchang a nih thu a sawi a, chief minister-in anticipatory bail la tura a rawn chu lak a tum loh thu leh tan ina tan mai ni lo, a tul chuan ram tan chuan thih pawh a huam thu a sawi. He thubuaia sum tihchingpen chungchangah a fihlim thu leh cheng khat pawh a eiruk loh thu a sawi.