AZL: ZPM Thalai Headquarters chuan nimin khan Upper Republic-a an pisa-ah blood donation camp an buatsaih.
Civil Hospital, Blood Bank, Aizawl-a thawktute’n a hmunah kal chilhin donation camp hi an neih pui a, thisen unit 51 pek a ni.
ZPM Thalai Hqrs., Vice President Zoramchhana Sailo kaihhruaiin thisen pek hmaa inkhawm tawi neih niin, he hunah hian ZPM Thalai Hqrs. President Jeje Lalpekhlua, South Tuipui bialtu MLA chuan Mizo thalaite chu midang nun chhanna atana thisen pek kawngah an thanharh zel a tul thu a sawi a. Blood Donation Camp te pawh tun aia zau zawk leh ruahmanna fel zawka an la huaihawt leh tur thu a sawi.
He hunah hian Mizoram Assembly Speaker Lalbiakzama leh Tuichang bialtu MLA & W. Chhuanawma, Mizoram Assembly Dy. Chief Whip te’n hmanpuiin thu an sawi bawk.