Aizawl: Chief Minister Lalduhoma’n nimin khan mau sawngbawlna hawngin, tun lai mila mau an hman thiam zel hian ram sum leh pai tithatu, eizawnna tam tak siamsaktu a ni thei tih a sawi.
National Bamboo Mission fund Rs nuai 252.826 senga Bamboo Treatment & Seasoning Plant, Bamboo Depot & Godown leh Activated Charcoal Unit (Meihawl siamna) te chu nimin khan Chief Minister Lalduhoma’n Sairang Horticulture Centre-ah a hawng.
Hawnna inkhawmah Lalduhoma chuan National Bamboo Mission hmalakna hmanga mau sawngbawlna thar an nei ta chu lawmawm an tih thu sawiin, “Mau hi kan ramin resource kan neih that a ni a, a chhawr pawh kan chhawr tangkai a. Tunlai mila kan hman thiam zel hian kan economy tithatu, eizawnna tam tak min siamsaktu a ni thei a ni. A treatment plant atanga sawngbawl tawh te hi kum 50 thleng hman theih tura ngaih a ni a. Mau hmanga thil siam thinte tan a hlu hle ang,” a ti.
Meihawl siamna hnar ber chu thing a ni thin tih sawiin chief minister chuan, “Thing rawn puitlin hun chhung hi a rei a, mau erawh chu kum hnih khat lekah an rawn lian leh mai a, a zung nena kan kar a nih loh phei chuan an thi hlei thei lo. Chuvang chuan, meihawl siam nana mau kan hman hian kan ramngaw chereu chak lutuk tur kha kan veng a ni,” a ti bawk.
Inkhawmah hian C. Lalsawivunga, Horticulture Minister chu khualzahawm a ni a, Prof Lalnilawma, Minister, RD leh H. Ginzalal, Technical Adviser to CM ten an telpui bawk.